ئاراس له‌ گوندێکی دووره‌ده‌ستدا ده‌ژی و ده‌یه‌وێت وێنه‌یه‌کی فۆتۆگرافی نه‌نکی بگرێت. بۆ ئه‌وه‌ی وێنه‌گرێک بێت بۆ ئه‌وێ، ده‌بێت خه‌ڵکی تر بدۆزێته‌وه‌ تا به‌شداری تێدا بکه‌ن.

ئه‌مه‌ چیرۆکی یه‌ک ڕۆژ له‌ ژیانی کچێکی بچکۆله‌ی کورده‌ که‌ چۆن له‌ شه‌قامه‌کانی ئه‌سته‌نبوڵدا، که‌ پڕ له‌ خه‌ڵک و ئۆتۆمۆبیلن، ژیانی خۆی به‌ سه‌ر ده‌بات. ڕۆژێک پێنج لیره‌ له‌سه‌ر ئه‌رزه‌که‌ ده‌دۆزێته‌وه‌ و ده‌یه‌وێت پێنج لیره‌که‌ هه‌ڵگرێته‌وه‌، به‌ڵام ئاسان نییه‌.

وا پێده‌چێت، سوسه‌ن، هه‌موو شتێکی هه‌بێت. پیاوێک که‌ خۆشی ده‌وێت، کارێکی باش و ماڵێک بۆ حه‌وانه‌وه‌. به‌ڵام له‌ پشت هه‌موو ئه‌مانه‌وه‌ خه‌مۆکییه‌ک له‌ ژیانیدا هه‌یه‌، ئه‌ویش ته‌واوکردنی ژیان و ماڵه‌که‌یه‌تی به‌ مناڵێک. به‌یانییه‌ک له‌ زه‌نگی ده‌رگاکه‌ی ده‌درێت...

ئه‌گه‌ر ڕۆژێک له‌ ڕۆژان ناچار بوویت ئه‌و شاره‌ی تێیدا له‌ دایک و گه‌وره‌ بوویت به‌ جێ بهێڵیت، چی له‌گه‌ڵ خۆتدا ده‌به‌یت؟ جه‌مبه‌لی هه‌موو ژیانی خۆی له‌ حه‌سه‌نکێفدا به‌سه‌ربردووه‌، به‌ڵام به‌ هۆی به‌نداوی (ئیلیسو)ه‌وه‌ ناچاره‌ کۆچ بکات و به‌ جێی بهێڵێت. خه‌ونی ئه‌و هه‌ر به‌ ته‌نیا ئه‌وه‌یه‌ که‌ له‌ ته‌نیشت ژنه‌ مردووه‌که‌یه‌وه‌ بنێژرێت و ئیسقانه‌کانی له‌گه‌ڵ خۆیدا ده‌بات و بۆ هه‌تاهه‌تایه‌ حه‌سه‌نکێف به‌ جێ ده‌هێڵێت.

مامۆستایه‌ک هه‌ست ده‌کات یه‌کێک له‌ قوتابییه‌کانی ده‌توانێت زۆر به‌ چاکی لاسایی ده‌نگی باڵنده‌ بکاته‌وه‌ و هه‌ر له‌به‌ر ئه‌وه‌ش له‌ قوتابخانه‌ دوا ده‌که‌وێت، چونکه‌ ناچاره‌ یارمه‌تیی ڕاوکه‌رانی ناوچه‌که‌یان بدات.

دۆکیومێنته‌رییه‌کی بچووک (به‌ ئه‌نیمه‌یشن) له‌سه‌ر کوڕێکی کورد که‌ له‌ ته‌مه‌نی سیانزده‌ ساڵاندا له‌ وڵاتی خۆیه‌وه‌ ده‌نێردرێته‌ ده‌ره‌وه‌ و کۆتاییه‌که‌ی به‌وه‌ ده‌گات که‌ ژیان له‌ به‌ریتانیا به‌ سه‌ر ببات. "په‌نابه‌ر" له‌سه‌ر چه‌ند چاوپێکه‌وتنێک له‌گه‌ڵ ئه‌م کوڕه‌دا هه‌ڵچنراوه‌.